ШҚО-дағы балалар телеграм-бот арқылы көмек сұрай алады

Телеграм-бот қылмыстың және жағымсыз салдардың алдын алу алаңы болмақ, деп хабарлайды Устинка LIVE тілшісі ШҚО Прокуратурасының ақпаратына сүйеніп.

Бүгінгі таңда мемлекет балалардың құқықтарын қорғау және балаларға қатысты заңсыз әрекеттер, соның ішінде, зорлық-зомбылық және буллинг үшін жауапкершілікті күшейту бойынша маңызды шараларды қабылдауда. Мұндай фактілердің алдын алу үшін прокуратура жаңа әдістерді қолданады.

Осыған байланысты облыс прокуратурасы URPAQ ("Ұрпақ") жобасына бастамашы болды.

"Telegram" мессенджеріндегі "vko_urpaq_bot" боты балаларға қатысты құқықбұзушылықтар туралы ақпаратты жинауға арналған автоматтандырылған жүйе. Бот әр түрлі форматтағы (фото, аудио, бейне, Word) келіп түскен хабарламаларды өңдеуге мүмкіндік береді. Кез келген адам мен бала шұғыл көмек сұрай алады немесе балаларға қауіп төндіретін ақпаратты (ашық люктер, жолдағы жағдай, қаңғыбас иттер және т.б.) жібере алады, - деп хабарлады ШҚО Прокуратурасы.

Хабарламаны анонимді түрде қалдыруға да болады.