Глубокое ауданында туризмді қалай дамытпақ?

Өңірлік коммуникациялар қызметінің баспасөз конференциясында Глубокое ауданының әкімі Эльдар Тұмашинов ауданда туризмді дамыту туралы жоспарларымен бөлісті, деп хабарлайды Устинка LIVE тілшісі.

Біз "Таулы Үлбі – "Алтай Альпісі" ТШК" туристік бағытын дамыту тұжырымдамасын әзірледік. Мемлекет пен бизнес жоспарлы түрде бірнеше жыл ішінде бәсекеге қабілетті туристік бағыт құратын болады, - деді Эльдар Тұмашинов.

Көру алаңы, кемпинг-аймақ, жәрмеңке аймағы бар сауда орындары, велосипедті жалға алу, жағажай аймағы, балалар алаңы бар аллеяны, сондай-ақ SPA-орталық, қонақ үйлер, жабық бассейн, футбол алаңын, "The Forest" мейрамханасы орналасқан жерде жылдам тамақтану пунктін салу жоспарда бар. Туристердің көптеп келуі үшін "Алтай Альпісі" тау-шаңғы курортында мейманхана, жылы беседкалар, ілмек көтергішті арқан жолдар және бэби-лифт салу жоспарланып отыр.

Туризмді тартымды және танымал ету мақсатында бірқатар іс-шаралар қарастырылған, бұл біздің ауданға туристер санын көбірек тартуға мүмкіндік береді. Осындай іс-шаралардың бірі өткен демалыс күндері ғана өтті - ски-кросс және сноуборд-кросс бойынша әуесқойлар арасында ашық біріншілік. Жарысқа қатысушылар мен қонақтар оң пікірін білдірді, - деп атап өтті спикер.