Өскемен мен ШҚО Шығысқазақстандық студенттер ақылды шкаф ойлап тапты
Студенттердің өнертабысын қазір қаладағы фитнес-орталықтардың бірі пайдалануда
С. Аманжолов ат. ШҚУ-дың "Ақпараттық жүйелер" мамандығының студенттері ШҚО Цифрландыру және архивтер басқармасында және "TerraSport" фитнес-орталығында келушілерге интеллектуалды қызмет көрсету сервисін әзірлеп, қолданысқа енгізуде, деп хабарлайды Устинка LIVE тілшісі.
Жас өнертапқыштар Рүстем Жұмабек, Мирас Екпінов, Аружан Ражапова және Жавохир Құрбаналиевтің айтуынша, жобалық кезеңнің барлық сатысында заманауи бағдарламалар мен өндіріс технологиялары қолданылған. Атап айтқанда, С++, С#, Python, Php, Java, MySQL.
Инновациялық шкафты әр келуші жеке QR-код пен Face ID идентификациясы арқылы пайдаланады. Әдеттегі кілттердің орнына адам биометриясының ерекшеліктері қолданылады. Бұл жоғары қауіпсіздік пен жұмыс процестерін автоматтандырудың кепілі. Тағы бір ерекшелігі басқа елдерде жасалған ұқсас жүйелерді экономикалық тиімді импортты алмастыруында жатыр.
Айта кетейік, жасанды интеллект жобасы ЖОО профессоры Бақытжан Көпжасаров пен IT және жаратылыстану ғылымдары жоғары мектебінің деканы Салтанат Адиканованың жетекшілігімен жүзеге асуда.
