Өскемен мен ШҚО ШҚО-да бір үйдің екі баласын ит талап тастаған
Глубокое ауданының Белоусовка ауылында тұратын бір отбасының екі баласы да Ана мен бала орталығында жатыр
Балалардың біріне шұғыл түрде ота жасалған, деп хабарлайды Устинка LIVE тілшісі.
Ақпаратты ШҚО денсаулық сақтау басқармасының баспасөз қызметі растады.
Ит қапқан бір үйдің екі баласы облыстық Ана мен бала орталығына түсті, - деді басқармасының баспасөз хатшысы Асем Қайратбек. - Бірі 21 қараша, екіншісі 25 қараша күні жеткізілген. Екеуі де қазір стационарда ем алып жатыр. Біреуі көз микрохирургиясы бөлімшесінде, екіншісі нейрохирургия бөлімшесінде. Бір баланың көзінің маңайы, қабағынан жарақат алғандықтан шұғыл ота жасалды.
Балалардың бірі бастапқыда ауруханаға түскенде өзін ит қапқанын айтпаған. Ол құлап, маңдайын шыны кесіп кетті деген. Бірақ кейін шындығын айтқан көрінеді.
Анықталғандай, балалар әдеттегідей көрші үйге ойнауға барғанда көршінің иті талап тастаған.
