Өскемен мен ШҚО Бұқтырма үстінен салынып жатқан көпір қашан пайдалануға беріледі?
Бұқтырма су қоймасы арқылы өтетін көпір 2025 жылдың алғашқы тоқсанында пайдалануға берілмек
Бұл туралы Шығыс Қазақстан облысының жолаушы көлігі және автомобиль жолдары басқармасының басшысы Нұржан Жұмаділов мәлімдеді, деп хабарлайды Устинка LIVE тілшісі.
Қазіргі уақытта көпір құрылысына 27,4 млрд теңге жұмсалған.
Бүгінгі күні облыстағы ірі инфрақұрылымдық жобаларды іске асыру одан әрі жалғасып жатыр. Бұқтырма су қоймасы арқылы өтетін көпір құрылысы бойынша 27,4 млрд теңге игерілген. Жобаның жалпы құны – 61,4 млрд теңге. 21 көпір тірегінің 11-і орнатылып, 7 көпір тірегінің жұмысы жалғасуда. Көпір аралықтарының 20 металл конструкциясының 14-і Ресейдің Курган қаласында дайындалып, учаскеге жеткізілген. Олардың алтауы орнатылған, - дейді Нұржан Жұмаділов.
"ОблШығысжол" ЖШС директорының орынбасары Әсет Сұлтанов ел күтіп жүрген көпір келер жылдың аяғында техникалық тұрғыда іске қосылып, 2025 жылдың алғашқы тоқсанында пайдалануға берілетінін айтады.
Құрылыс жұмыстары қыста да тоқтамай жүре береді. Ұлттық сапа орталығы көпір құрылысын жіті бақылауда ұстайды.
