Өскемендегі орталық кітапхана ұлттық ойындар челленджіне қатысады

Оқу-ағарту министрлігі 17 қарашада еліміздің барлық мектептерінде бір мезетте ұлттық ойындар челленджі өтеді деп жариялаған болатын, деп хабарлайды Устинка LIVE.

Осыған орай Оралхан Бөкей атындағы орталық қалалық кітапхана республикалық ұлттық ойындар челленджін ерекше өткізуді жоспарлауда.

Кітапхана ата-бабадан жеткен асыл мирасымызды жастар арасында кеңінен насихаттап, үйрету мақсатында заманауи технологиямен үйлестіре өткізетін болады.

17 қарашада сағат 13.00-де біздің кітапханада тоғызқұмалақ, асық және бес тас ойнап, ұлттық рухымызды көтеруге келіңіздер, - деп шақырады кітапхана ұжымы. - Ұлттық ойындарды заманауи технологиямен қалай үйлестіргенімізге куә боласыздар. VR дулығамен және ұялы телефондағы қосымшада асық ойнауды үйретеміз. 3D принтермен асықтарды қалай жасау керектігін көрсетеміз.

Кітапхана мекенжайы: Е.П. Славский атындағы жағалау, 22. Сұрақтарыңыз болса, 8-747 212 83 31; 8-7232 25 17 70 нөмірлері арқылы хабарласуға болады.