Өскемен мен ШҚО Сенбілікке қатысқан өскемендіктер ақшалай сыйлыққа ие болады
"Таза ойын" эко-сенбілігіне қатысып, көп қоқыс жинағандарға демеуші қомақты қаржылай сыйлық дайындады
Сенбілік 23 қыркүйек күні өтеді, деп хабарлайды Устинка LIVE Өскемен қалалық әкімдігі ақпаратына сүйеніп.
Берілген уақыт ішінде ең көп қоқыс жинаған команда қатысушылары жеңімпаз атанады. Бір командада 10 адам болуы қажет. Қатысушылардың жасы 16 жастан асқан болуы керек. Ал, 16 жасқа дейінгі балалар ата-анасымен немесе ресми өкілімен бірге қатыса алады, - делінген хабарламада.
Яғни, қоқыс жинауға 1 сағат уақыт беріледі. Сол бір сағатта жиналған қоқыс мөлшері бойынша жүлдегерлер анықталады:
- 1-орын үшін 400 мың теңге
- 2-орын үшін 200 мың теңге
- 3-орын үшін 100 мың теңге
- Ынталандыру жүлдесі 50 мың теңге.
Қатысушылар 23 қыркүйек күні сағат 10.00-де Назарбаев даңғылы, 83/1 мекенжайындағы үйдің алаңына келіп, топтарын тіркеуі қажет. Ал қоқыс жинау уақыты 11.00-12.00 аралығы.
Сенбілікке қатысушылардан ыңғайлы жұмыс киімімен келуді, қажет болған жағдайда бас киім, антисептик, дымқыл майлықтар, су, жұмыс қолғаптары болуын сұраймыз. Егер Сіз өзіңіздің қабілеттеріңізге сенімді болсаңыз, 20-дан астам қоқыс қаптарын толтыра аламын деп ойласаңыз, өзіңізбен қосымша қоқыс қаптарын алып келуге болады, - деп ескертеді ұйымдастырушылар.
"Таза ойындар" эко–сенбілігінің бас демеушісі "Казцинк" ЖШС компаниясы @kazzinc_official болып табылады.
