ШҚО әкімі Риддердегі ЖЭО қарызы қанша екенін атады
Шығыс Қазақстан облысының жаңа әкімі Ермек Көшербаев өңір бойынша алғашқы сапарын өңірдегі ең маңызды нысандардың бірі - "Риддер ЖЭО" АҚ жұмысымен танысудан бастады
![Усть-Каменогорск и ВКО / Глава области озвучил размер задолженности Риддерской ТЭЦ Усть-Каменогорск и ВКО / Глава области озвучил размер задолженности Риддерской ТЭЦ](/upload/iblock/309/sn2g3wd7bvtkwhf69xvvqvzp36h8uq8g/glava_oblasti_ozvuchil_razmer_zadolzhennosti_ridderskoy_tets.jpg)
Онда жылу орталығының басшылығымен және жөндеу жұмыстарына тартылған мердігер ұйымдармен кеңес өткізді.
Аймақ басшысына нысанды қайта құру бойынша атқарылып жатқан жұмыстар жайлы баяндалды. Жаңадан тағайындалған Бас директор Игорь Михайленко 5 жыл бұрын осы ЖЭО-ны басқарған және оның ерекшеліктерін жақсы біледі.
- 2018 жылы 5 қазандық жұмыс істеді, 1 резервте болды, 4 турбина жұмыс істеді, 52 МВт өндірілді және компанияның шотында 1 млрд теңге болды. Меншік иелері жылу орталығына тиісті жөндеу жұмыстарын жүргізбей пайдаланып келді. Қазір қарыздары 3,3 млрд теңгені құрайды, - деді Бас директор Игорь Михайленко.
Оның айтуынша, жөндеу жұмыстары жоспарға сәйкес жүргізілуде. Өңір басшысы сұрақтарды тыңдап, бейінді ведомстволардың басшыларына тиісті тапсырмалар берді.
- Мен осы уақыт ішінде қаланың игілігі үшін жұмыс істеп жатқан қызметкерлерге, сондай-ақ шыдамдылық танытып, жағдайды түсінген риддерліктерге алғыс білдіремін. Жылыту маусымының басына дейін жөндеу жұмыстарын аяқтау үшін бар күшімізді саламыз. Біз бұл қаланы жылумен қамтамасыз етуіміз керек, - деді Шығыс Қазақстан облысының әкімі Ермек Көшербаев.