ШҚО-да әйелдерді онкогинекологтар бір апта бойы тегін қарайды

Жатыр мойны обырының алдын алу үшін 30 жастан 70 жасқа дейінгі әрбір әйел онкогинекологтың қарауынан өтуі керек, деп хабарлайды Устинка LIVE тілшісі облыстық онкология және хирургия көпсалалы орталығының ақпаратына сүйеніп.

23-29 қаңтар аралығында облыстық көпсалалы онкология және хирургия орталығында жатыр мойны ауруларының алдын алуға және ерте диагностикалауға назар аударуға арналған іс-шаралар өтеді, - делінген хабарламада. - Атап айтқанда, ақпараттық науқан жатыр мойны скринингі, адам папиллома вирусына (HPV) қарсы вакцинациялау, цитологиялық скрининг, жатыр мойны обырының факторлары мен белгілері туралы ақпараттануды арттыруға бағытталған.

Сондай-ақ, 28 қаңтарда облыстық онкология және хирургия көпсалалы орталығының консультативтік-диагностикалық бөлімшесінің базасында ұйымдастырылатын ашық есік күні аясында барлық жастағы әйелдер тегін гинекологиялық тексеруден өте алады. Егер тексерілушілерде ары қарай зерттеу жүргізуге көрсетілімдер болса, төмендегідей диагностикалық қызметтер тегін жүргізіледі: жамбас мүшелерінің ультрадыбыстық және МРТ зерттеуі, цитологиялық зерттеу (ПАП-тест-атипті жасушалардың бар-жоғын тексеру үшін жатыр мойнынан жағынды алу), гинеколог-онкологтан кеңес алу.