Келер жылы Өскеменге жаңа автобустар сатып алынады

Бұл туралы шаһар басшысы Жақсылық Омар қалалық мәслихат сессиясында айтты.

Қала әкімдігінің мәліметіне сүйенсек, электронды билеттеу жүйесі енгізілгелі бері қоғамдық көліктердегі жолаушылар саны өткен жылмен салыстырғанда 31 пайызға өскен. Осының нәтижесінде салық көлемі біршама артып отыр. Жалпы 2022 жылы Өскемен тұрғындары электронды билеттеу әдісімен жол жүру ақысын 45,2 миллион рет төлеген.

Келер жылы тасымалдаушы компаниялардың автопаркі жаңартылады. Ол үшін 77 автобус сатып алу жоспарлануда. Осы жылы 53 жаңа автобус алынған, - дейді шаһар басшысы Жақсылық Омар.

Сонымен қатар, биыл қалада 54 аялдама жаңартылып, 2 жылы аялдама пункті орнатылған. Ал келер жылы қала бойынша 40-тан астам аялдама ауыстырылып, тағы бірнеше жылы аялдама салынбақ.