Өскемен мен ШҚО ҚР Төтенше жағдайлар Вице-министрі ШҚО халқымен кездесті
Кездесуде өңірдегі төтенше жағдайлардың алдын алу саласындағы, оның ішінде туризм, ТЖМ жүйесіне жұмысқа орналасу саласында дамып келе жатқан түрлі өзекті мәселелер талқыланды
ШҚО-да 10 ай ішінде өңірде ТЖ кезінде қаза тапқандар саны 28,9%-ға азайған, деп хабарлайды ШҚО ТЖД ақпаратына сүйеніп.
Жалпы 1 100-ден астам төтенше жағдай тіркелді. Департамент бөлімшелері 6 мыңнан астам рет шақыртуларға шыққан. 1 052 адам құтқарылды және эвакуацияланды, - деп атап өтті ТЖ вице-министрі Марат Күлдіков.
Марат Күлдіков көшкін қаупі бар кезеңдегі профилактикалық іс-шараларға мамандардың назарын аудара отырып, алдағы қысқы кезеңге дайындықты талқылады.
Облыста автожолдар мен елді мекендерге қауіп төндіретін 325 көшкін қаупі бар учаске бар. Оларды мұқият бақылау, жердегі және аэровизуалды тексерулер жалғасуы керек. Қар массасының түсу қаупі төнген кезде профилактикалық түсулерді жедел ұйымдастыру қажет, - деп атап өтті Марат Күлдіков.
Сондай-ақ, №8 өрт сөндіру бөлімінің бірінің базасында жеке құраммен кездесу барысында өрт сөндірушілердің жалақысын көтеру және әлеуметтік жағдайларын жақсарту туралы сөз болды.
Марат Күлдіков жаңа өрт сөндіру депосының құрылысына бөлінген жер учаскесінде де болды. Ол облыс орталығының қарқынды дамып келе жатқан аудандарының бірінде орналасқан, онда жыл сайын көптеген тұрғын үй қоры мен нысандар, оның ішінде көпқабатты нысандар салынады, сондықтан депо қажетті жабдықтармен және техникамен жарақтандырылып, 34 мыңға жуық азаматтың қауіпсіздігін қамтамасыз етеді.
