Өскемендегі №8 арнайы мектеп-интернатының басшылығы тәртіптік жауапқа тартылады

Мектеп-интернаттың қызметкерлері әлеуметтік желіде білім мекеемесінің басшылығына қатысты наразылықтарын білдірген болатын, деп хабарлайды Устинка LIVE. Осыдан кейін ШҚО Білім басқармасы мектеп-интернатта тексеріс жүргізіп, мектеп директорының міндетін атқарушыны жауапкершілікке тарту туралы шешім шығарған.

Қызметкерлер мектепте балаларға тамақ пен гигиеналық заттар талапқа сай мөлшерде берілмейтінін және ғимараттың сынған мүлкіне өздерінен ақша жинау талап етілетінін, одан өзге мұғалімдер шаруашылық жұмыстарға да өздерін күштеп жұмсайтынын айтқан. Ал келіспейтіндерге арыз жазып, өз еркімен жұмыстан кетуден басқа амал қалмапты-мыс.

Бұл интернатта облыстың әр өңірінен жиналған 166 бала оқиды. Көбін ата-аналары тек ұзақ демалыстарда ғана үйлеріне алып кететін көрінеді. Интернат толықтай мемлекеттің қамқорлығында, жыл сайын 400 млн теңге қаржы бөлінеді.

ШҚО білім басқармасының деректеріне сәйкес, интернаттағы балалардың құқықтары бұзылмағаны анықталды. Ал БАҚ-тағы жарияланымдар еңбек ұжымындағы жанжалдың салдары болды. «Шағымды қарау үшін білім басқармасы басшысының м.а. 2022 жылғы 21 қыркүйектегі № 447 бұйрығы негізінде білім және ғылым қызметкерлері кәсіподағының Білім басқармасы мен Өскемен қалалық ұйымдарының өкілдері атынан жұмыс тобы құрылды. Аталған фактілердің бір бөлігі 2022 жылғы 13 қыркүйектегі өтініште расталды, - деді ШҚО Білім басқармасының қорғаншылық, қамқоршылық және арнайы білім беру бөлімі басшысының м.а. Гүлжаз Бошақова.

Қарау қорытындысы бойынша мекеме директорының м.а. тәртіптік жауапкершілікке тарту туралы шешім қабылданды. Алайда, 28 қыркүйектен бастап ол денсаулығына байланысты уақытша жұмыста жоқ. Осыған байланысты жұмысқа шыққаннан кейін жауапкершілікке тартылады.

Өтініш берушілерге қолданыстағы заңнамаға сәйкес өтініште көрсетілген мекенжай бойынша жауап берілді. Бұл мәселе ШҚО білім басқармасының бақылауында, - деді спикер.