Өскемен мен ШҚО Ұлттық жоба аясында ШҚО-да бес мыңнан астам адам тұрақты жұмысқа тұрды
ШҚО бойынша субсидиялау және кепілдендіру бойынша "Кәсіпкерлікті дамыту жөніндегі ұлттық жоба" бағдарламасын іске асыру мәселелері қаралды
Бүгін онлайн және оффлайн форматта Шығыс Қазақстан облыстық мәслихатындағы AMANAT партиясы депутаттық фракциясының жиналысы өтті. Жиын барысында ШҚО мәслихатындағы AMANAT партиясы депутаттық фракциясының жетекшісі сайланды.
Фракция мүшелерінің дауыс беруімен ШҚО мәслихатының депутаты Лұқбек Тұмашинов ШҚО мәслихатындағы AMANAT партиясы депутаттық фракциясының жетекшісі болып сайланды.
Сонымен қатар, жиын барысында ШҚО Жұмыспен қамту және әлеуметтік бағдарламаларды үйлестіру басқармасы мен ШҚО Кәсіпкерлік және индустриалды-инновациялық даму басқармаларының өкілдерінің ағымдағы жылдың 8 айында атқарған жұмыстары бойынша есептері тыңдалды.
Кәсіпкерлікті дамыту жөніндегі 2021-2025 жылдарға арналған ұлттық жобаны іске асыруға 2022 жылы республикалық және жергілікті бюджеттерден 3,8 млрд теңге бөлінді. 2022 жылғы 22 қыркүйектегі жағдай бойынша Шығыс Қазақстан облысында ұлттық жобаға қатысу үшін 14 134 адам өтініш білдірді, оның ішінде 12 480 адам бағдарламаға қатысты. Ұлттық жоба аясында жұмыспен қамту бойынша 12 696 көмек көрсетілсе, 8 334 адам жұмысқа орналастырылды, оның ішінде 5400 адам тұрақты жұмыспен қамтылды, - деді ШҚО Жұмыспен қамту және әлеуметтік бағдарламаларды үйлестіру басқармасы басшысының орынбасары Досхан Қайрғазинов.