Өскемен мен ШҚО Шығысқазақстандықтар екі ай ішінде емхананы еркін таңдай алады
15 қыркүйекте елімізде алғашқы медициналық-санитариялық көмек ұйымына еркін тіркелу науқаны басталды. Бұл науқан қараша айының ортасына дейін жалғаспақ
Шығыс Қазақстанда 2022 жылы алғашқы медициналық-санитариялық көмек көрсететін 25 медициналық ұйым Әлеуметтік медициналық сақтандыру қорымен шарт жасасты, деп хабарлайды Устинка LIVE.
Оның 16-сы мемлекеттік мекеме және 9-ы жекеменшік. Олардың тізімін Қордың fms.kz сайтындағы "Клиниканы таңдау" бөлімінен көруге болады. Пациент алғашқы медициналық-санитариялық көмек көрсететін мемлекеттік, сонымен қатар жекеменшік ұйымға тiркеле алады. Алдын ала таңдаған клиникада бос учаскелер бар-жоғын нақтылап алған абзал.
Қазіргі таңда аймақта алғашқы медициналық-санитариялық көмек көрсететін ұйымдарға 738 883 адам тіркелген, оның ішінде 503 378 адам қалалық елді мекендерде, 235 455-і ауылдық жерлерде.
Аталмыш акция елімізде жыл сайын өткізіледі. Науқан кезінде қазақстандықтар өздері тіркеуде тұрған емхананың жұмысына қанағаттанбаса, басқа емханаға ауыса алады немесе өз емханасы ішінде басқа учаскелік дәрігерді таңдауға мүмкіндігі бар, - дейді ӘМСҚ ШҚО филиалының директоры Нұрлан Қыдырбаев. - Алғашқы медициналық-санитариялық көмек ұйымына тіркелген пациент учаскелік дәрігердің қабылдауы, өзінің денсаулық жағдайын бақылау, амбулаториялық дәрі-дәрмекпен қамтамасыз ету, скринингтік тексерулер, диагностикалық зертханалық және аспаптық зерттеулер сынды медициналық көмек пен емдеуге жатқызуға жолдама алады.
Медициналық көмексіз қалмауы үшін ел азаматтары тұрғылықты жері бойынша емханада немесе электрондық үкімет веб-порталындағы жеке деректерде (ЭЦҚ арқылы авторизациялау) тіркелу мәртебесін тексеру қажет.
Айта кетерлігі, тіркеу науқаны пациентке 2023 жылдың 1 қаңтарынан бастап қызмет көрсететін клиниканы таңдауына мүмкіндік береді.
Емхана таңдауда басты ескеретін жайт – ол үйден 15-20 минут уақытта жаяу жететін жерде орналасқаны жөн, - дейді Нұрлан Қыдырбаев. - Барлық емханалар аумақтық қағидат бойынша жұмыс істейді және пациент емхананың қызмет көрсету аумағында тұрған кезде ғана үйде медициналық көмек көрсетіледі. Бұл учаскелік дәрігердің немесе мобильді бригаданың көмегі қажет болған жағдайда оның жедел жетуіне, сондай-ақ, отбасы мүшелерінің бір дәрігерге қаралуына мүмкіндік береді.
Емханаға қалай тіркелуге болады?
Бірінші әдіс - бұл барлық азаматарға арналған. Электрондық үкіметтің веб-порталы арқылы бекіту: www.egov.kz сайтындағы "Денсаулық сақтау" бөлімінде "Медициналық-санитариялық алғашқы көмек көрсететін медициналық ұйымға тіркелу" қызметін таңдау қажет. Ары қарай электрондық өтініштің барлық жолдарын толтыру қажет. Пациент туралы мәліметтерді емхана мемлекеттік ақпараттық жүйелерден автоматты түрде алады. Жауап оң болған жағдайда медициналық ұйымға тіркелгеніңіз туралы хабарлама беріледі.
Екінші әдіс - халықтың жекелеген санаттарына арналған. Олар емханаға жеке басын куәландыратын құжатпен тікелей жүгіне алады. Атап айтар болсақ, олар зейнеткерлер, мүгедектер, қамқоршылар тағайындалған заң бойынша бала кезінен мүгедектер, қорғаншылар немесе қамқоршылар, патронаттық тәрбиешілер, колонияда жазасын өтеушілер, студенттер, мерзімді қызмет әскери қызметшілері, шет мемлекеттерде туған балалар, сенімхат бойынша бекітуді рәсімдейтіндер.
Айта кетейік, емхананы еркін таңдау құқығын пайдаланбаған азаматтар бұрын өзі қаралған алғашқы медициналық-санитариялық көмек ұйымында тіркелген күйі қалады.
