ШҚО құтқарушылары 2000-нан астам отбасының үйіне газ датчиктерін тегін орнатады

ШҚО ТЖД мен "Қазмырыш" ЖШС арасында жасалған меморандум аясында кәсіпорын ТЖД-ға 2140 дана улы газ датчиктерін табыс етті, деп хабарлайды Устинка LIVE тілшісі.

Датчиктер облыстың 11 қаласы мен ауданына таратылады және аз қамтылған көпбалалы отбасылардың, мүгедек адамдардың, жалғызбасты қарт азаматтардың үйлеріне орнатылады.

Дабылқаққыштар тұрғын үй-жайларда қауіптілік туралы ескерту мақсатында орнатылады және улы газ датчикке енгенде, "дабыл" сигналы іске қосылады. Датчик "сигнализацияның" бір түрі ретінде қызмет етеді. Бұл тұрғындарға уақытында өздерін құтқару шараларын қабылдауға мүмкіндік береді, өйткені жазатайым оқиғалар көбінесе түнгі уақытта, тұрғындар ұйықтап жатқанда орын алады, - деп атап өтті ШҚО ТЖД бастығының орынбасары Серік Амангелдин.

Соңғы үш жылда осы құрылғылардың арқасында 7 қайғылы оқиғаның алды алынды. Нәтижесінде 30 адам, оның ішінде 23 бала құтқарылды.