Өскемен мен ШҚО Зайсан-Өскемен бағытында күнделікті жолаушы тасымалдайтын автобус табылмай отыр
Зайсан ауданы әкімдігі бұл бағыттағы автобус ертеңнен бастап жолаушыларды күнделікті тасымалдайтынын мәлімдеді
Естеріңізге сала кетейік, қазіргі таңда Зайсан-Өскемен бағытындағы автобус бір күн сайын жүріп отыр. Өйткені автобус саны жеткіліксіз.
Ағымдағы жылдың 12 шілдесінен бастап Зайсан – Өскемен, Өскемен – Зайсан бағыты бойынша жолаушылар тасымалдайтын автобус күнделікті жүретін болады, - деп хабарлады Зайсан ауданы әкімдігі өзінің инстаграм әлеуметтік желісіндегі ресми парақшасында. - Зайсаннан сағат 19.00-де, Өскеменнен сағат 18.30-да шығады. Билет бағасы: 3900 теңге.
Алайда аудандағы автобекетке хабарласып едік, әзірге күнделікті тасымалдайтын автобус жоқ екенін және билет құны да нақты бекітілмегенін айтып отыр.
Негізі Зайсан - Өскемен бағытында автобус күнделікті жүріп отыруы керек, - деді автобекет қызметкері. - Алайда тасымалдаушы жеке кәсіпкердің жеті автобусынан екеуі қана қалды. Сол себепті күн аралатып тасымалдауға мәжбүрміз. Ал аудан әкімдігі ақпарат жариялап қойғанымен, нақты тасымалдаушы табылған жоқ. Автобусы бар жеке кәсіпкерлер бұл бағаға келіспей отыр.
