Өскемен мен ШҚО Өскемен тұрғыны алты танысын алдап соққан
Облыс орталығының тұрғыны пәтер рәсімдеуге көмектесемін деген сылтаумен таныстарынан ақша алып, жеті ай бойы алдап келген
23 мамыр күні тәртіп сақшылары алаяқтық әрекеті үшін 30 жастағы қала тұрғынын анықтады. Ол 25-50 жас аралығындағы алты келіншектің 13 000 000 теңгесін қалтасына басқан.
Анықталғандай, күдікті өзі де «жәбірленуші» ретінде полицияға көмекке жүгініпті. Оның айтуынша, өзі жақсы танымайтын "Жанна" есімді азаматша пәтер сатып алуға көмектеспек ниетпен 12 800 000 теңгесін алдап алған-мыс, - деп мәлімдеді ШҚО ПД баспасөз қызметі.
Тергеу нәтижесінде күдіктінің жалған сөйлегені анықталып, өзінен ешкім күдіктенбесі үшін осы оқиғаны ойдан шығарғаны белгілі болды.
Күдіктіге қатысты қазіргі уақытта ҚР ҚК 190-бабы 4-бөлігі "Алаяқтық" және ҚР ҚК 419-бабы 2-бөлігі "Жалған жала жапқаны үшін" сотқа дейінгі тергеу басталды.
