Бесқарағайда еш мектеп күрделі жөндеуді қажет етпейді

Аудандық әкімдік таратқан ақпараттарға сүйенсек, 18 мектепте 36 жоба бойынша жөндеу жұмыстары жүргізілуде. 

- Ағымдағы жылдың 29 шілдесіне 17 жоба бойынша жөндеу жұмыстары аяқталды. Бөденелі мектебінің 3-қабатын жөндеу бойынша конкурстық рәсімдер жақында ғана аяқталып, мердігер анықталды, - дейді аудандық білім бөлімі басшысының міндетін атқарушы Рустам Оразалин. - Барлық жөндеу жұмыстары ағымдағы жылдың 25 тамызына дейін аяқталады, арнайы комиссия құрылып, атқарылған жұмыстарды тексеріп, қабылдап алады.

Айта кетейік, ауданда барлығы 21 мектеп бар болса, оның 17-сіне биыл ағымдағы жөндеу жұмыстары жасалуда. Сонымен қатар, білім бөлімі орналасқан ғимарат та жөндеу көрмек. 

Жалпы Рустам Оразалиннің айтуынша, былтыр Бесқарағай ауданында 3 мектеп қана қашықтықтан білім берсе, қалғандары оқу жылын дәстүрлі түрде аяқтаған. Ауданда мектеп жасындағы 2966 бала болса, 166 түлек жаңа өмірге қанат қақты.