Қабанбай ауылдық округіндегі мектеп жарты ғасыр жөндеу көрмеген

Ауылдық елді мекендер үшін білім нысандарының талапқа сай болуы үнемі назарда. Аудан әкімдігіндегілер мәлімдегендей, "Ауыл - ел бесігі" бағдарламасымен республикалық және жергілікті бюджеттен жиыны 212 млн 421 мың теңге бөлініп, мектепте күрделі жөндеу жұмыстары басталды.

Осы мектепте 33 жыл қызмет істеп, талай шәкіртке тәлімді тәрбие, бәсекелі білім берген зейнеткер-ұстаз Ғибат Мамырбекова да білім ордасының жаңа сипатқа енетінін естіп-көріп айрықша қуануда.

- Оқушылардың заман ағымына байланысты талапқа сай жабдықталған мектепте оқуы олардың білімге деген ынтасын одан әрмен арттырады, - дейді ардагер ұстаз. - Ауылдағы бірден-бір маңызды нысандардың қатарындағы мектептерге ұдайы қолдау жасап отырған облыс әкіміне ризашылымды білдіремін.