Әскер қатарына алынғандар Өскемен гарнизонында ант қабылдады

Жастарды Қазақстанның әр аймағынан Өскеменге бір ай бұрын шақырған. Осы уақытта жігіттер жас сарбаздарға арналған арнайы сабақтардан өтті: оқ атудың алғашқы дағдыларын үйренді, сап түзеу жаттығуларын жасады, әскери жарғымен танысты. Енді ант беретін кез келді. 

Өскемен гарнизоны баспасөз қызметінің хабарлауынша, биыл бұл шара мемлекеттік маңызды мереке - Қазақстан Республикасының Конституциясы күніне сәйкес келді. Әскери бөлімнің уақытша командирі Аслан Кітапбаевтың айтуынша, бұл кездейсоқтық емес.
 

- Мен, Қазақстан Республикасының азаматы, Қарулы Күштер қатарына қосыла отырып, Қазақстан халқына және оның заңды түрде сайланған Президентіне адал болуға, егеменді мемлекетімнің Конституциясы мен заңдарын ақтық демім таусылғанша сақтауға ант етемін, - деп басталады әскери қызметкерлердің барлығы жатқа білетін мәтін.

Әскер қатарына қабылданушылар өздерінің конституциялық борышын абыроймен атқарып, өз елдерінің нағыз патриоттары екендіктерін дәлелдеу үшін салтанатты түрде ант берді. Салтанат жиын әскер қатарына шақырылушылардың көрсетілімімен және бөлімнің әскери оркестрінің арнайы музыкалық қойылымымен аяқталды.