Риддер полицейлері мұздатылған балықты ұрлаған ер адамды ұстады

4 тамызда Риддер полиция бөліміне жеке кәсіпкерден ұрлық туралы хабарлама келіп түсті. Әйел белгісіз біреу аспалы құлыпты бұзу арқылы балық өнімдерінің дүңгіршегіне кіріп, 31 килограмм мұздатылған балық пен 10 500 теңге ақшаны жасырын ұрлап кеткенін хабарлады. Жалпы материалдық шығын 57000 теңгені құрады, деп хабарлайды Устинка LIVE тілшісі.

ШҚО Полиция департаментінің баспасөз қызметінен хабарлағандай, Криминалдық полиция бөлімінің қызметкерлері Риддер қаласының 26 жастағы тұрғынын ұстады. Ұрланған тауар мен ақша тәркіленіп, иесіне қайтарылды.

- ҚР ҚК 188-бабы 3-тармағы 3-бөлігі бойынша қылмыстық іс қозғалды - тұрғын, қызметтік немесе өндірістік үй-жайға заңсыз кірумен жасалған ұрлық. Сотқа дейінгі тергеу амалдары жүргізілуде, - деді ШҚО ПД бастығының орынбасары Талғат Шаяхметов.

ШҚО Полиция департаменті жыл басынан бері тұрғын үй, қызметтік немесе өндірістік үй-жайға, қоймаға немесе көлік құралына заңсыз кірумен ұрлық жасағаны үшін жауапкершілік күшейтілгенін еске салады. Жәбірленушіге материалдық залал өтелсе де, оның күдіктіге, сотталушыға талаптары болмаса да, заңда жаңа өзгерістерге байланысты аталған санаттағы істер бойынша татуласу мүмкін емес.