Сын сағатта Үржарлықтар береке-бірлігін танытуда

Осы игі бастаманың аясында Үржар ауылында аудандық мәслихаттың депутаты, кәсіпкер Мұхаметхан Ақпеков сынды азаматтың мұрындық болуымен және кәсіпкерлердің қолдауымен «Үржарға көмек» атты қайырымдылық қоры құрылған болатын.

- Жиналған қаражатқа 20 млн теңгенің құрал-жабдықтары мен дәрі-дәрмектері алынып, ауруханаларға таратылды. Сонымен қатар, «Атамұра» корпорациясының президенті Рахымғали Құл-Мұхаммед Мақаншы ауданаралық ауруханасына 10 млн теңге көлеміндегі қаржыға оттегі концентраттарын, қорғаныш құралдарын және 1 млн теңге қаражатты «Үржарға көмек» қорына аударды. Ауданымыздың тумасы, кәсіпкер Құсман Шалабаев бұл бастамадан шет қалмай 1 млн теңге көлемінде өз демеушілігін көрсетті. Игі бастамаға ауданымыздан шыққан спортшылар да өз үлестерін қосуда. Атап айтсақ, ел намысын қорғап жүрген палуан Әсет Мәмбетов туған жері Алтыншоқы ауылын дәрі-дәрмектермен қамтамасыз етті. Көлденең ауылындағы «Юбилейный» ЖШС серіктестігі Үржар ауылында орналасқан ауданаралық аурухананың провизорлық бөлімінде ем қабылдап жатқан азаматтардың денсаулағын көтеру мақсатында қымыз және ет өнімдері таратылды, - деп жазды Үржар ауданды әкімдігінің әлеуметтік желісінде.

«Жұмыла көтерген жүк жеңіл» дегендей, төтенше жағдай кезінде аудан азаматтары 12 ауылдық округті дәрі-дәрмекпен қатамасыз еткен. 

- Аудан азаматтары 12 ауылдық округті дәрі-дәрмекпен қатамасыз етті.  Атап айтсақ: Үржар, Мақаншы, Алтыншоқы, Елтай, Жоғарғы Егінсу, Көкөзек, Қарақол, Таскескен, Бақты, Қабанбай, Қаратұма ауылдарында орналасқан медициналық мекемелерге жалпы сомасы 40 млн теңгеге жуық қаражаттың медициналық құрал-жабдықтары мен дәрі-дәрмектері табыс етілді. Сонымен бірге, «Халықтан халыққа» қайырымдылық қоры да үржарлықтарға демеушілік көрсетіп, медициналық құрылғылар мен дәрі-дәрмектер түріндегі көмектерін жасап жатыр. Көңілі дархан, жүрегі жомарт азаматтарымыздың бұл бағыттағы жұмыстары өз жалғасын табуда. Қиын-қыстау сәтте қол ұшын созған азаматтарымызға айтар алғысымыз шексіз!- дейді аудан әкімдігі.