ШҚО-да ер адам мен кішкентай баласына өз үйлерінде иіс тиген

Оқиға Глубокое ауданындағы Веселовка ауылында орын алды.

Көршілері екі пәтерлі жер үйден шығып жатқан түтінді байқап, өрт сөндіру қызметін шақыртқан. Бірақ ең жақын орналасқан ТЖ бөлімі Алтайский кентінде орналасқан. Ара қашықтығы 25 шақырым. Тұрғындар өрт құрсауында қалғандарды өз күштерімен құтқармақ болды. Жалындап жанған от болмаған, тек түтін шықты.

- Біз жеткенше көршілері екі жастағы бала мен оның әкесін үйден алып шыққан. Бірақ олар уланып қалған, - дейді ӨСБ-36 басшысы Жанұзақ Молдақанов. – Барлау барысында өрт ошағы диваннан шыққаны анықталған. Диванның үстіне спиральді су қайнатқыш қосулы қалдырылған.

Куәгерлер ер адамның мас болғанын айтады. Өрт себебі бойынша электр құрылғысын пайдалану кезінде өрт қауіпсіздік талаптарын сақтамау нұсқасы қарастырылуда.