Өскемендегі үйлердің подъездері де зарарсыздандырылады

Бұл коронавирустың таралуының алдын алу үшін жасалатын шара.

- Қалалық ТҮКШ 28-30 наурыз аралығында кондоминимум нысандарын басқаратын органдарға дезинфекциялық құралдар беретін болады, - деп мәлімдеді Өскемен қаласының әкімдігі. - Барлық тұрғындарды тазарту жұмыстарына белсенді қатысуға шақырамыз. Хлорлы затты 31 наурыздан бастап ПИК-терден алуға болады.

Ерітіндіні шыны, пластмасса немесе эмальды құтыда дайындауға болады. Ол үшін құбыр суына дезинфекцилық щатты еріту керек. Бір таблетканы 10 литр суға салып, 5 минутқа қалдыру қажет. Арнайы киімнің қажеті жоқ, мәрлі маска мен резеңке қолғап та жеткілікті.

- Шүберекті ерітіндіге сулап алып немесе бүріккішпен себуге болады, - деп ескертеді әкімдіктегілер. - Баспалдақ шарбақтарын, есік тұтқаларын, жарық қосқыштар, пошта жәшіктері, домофон мен лифт батырмаларын сүрту керек. Подъезде өңдеу жұмыстарын күніне екі рет жүргізген ләзім.