Көпір құрылысы қашан басталады?

Қазақстандағы ең ұзын көпірді Күршім ауданы Құйған ауылының тұсында салу жоспарланған, жалпы ұзындығы 1300 метрді құрайтын болады. Қазіргі уақытта жобалық-сметалық құжаттамасы дайын. Енді тендер жариялау, мердігер компанияны анықтау және онымен келісімшарт жасау жұмыстары басталмақ. Ал құрылыс үшін 2020 жылға республикалық бюджеттен 5 млрд теңге, облыстық бюджеттен 500 млн теңге бөлінгелі отыр. Жобаның жалпы құны 30,2 млрд теңге.

- Бүгінгі таңда бұл жобаға облыстық бюджеттен бөлек, республикалық бюджеттен 5 миллиард теңге көлемінде қаражат сұрап отырмыз. Көпір құрылысын жүргізу жоба бойынша үш жыл, яғни, 36 айға жоспарланған. Бұл барлық конкурстық процедуралар аяқталып, келісімшартқа қол қойылғаннан кейін басталады деген сөз, - дейді облыстық Жолаушылар көлігі және автомобиль жолдары басқармасының басшысы Нұржан Жұмаділов.

Мердігер анықталған соң рес-публика бюджетінен бөлінетін қаражатты күтпей құрылыс жұмыстары бастала береді. Яғни, анықталған мердігер компания құрылыс алаңын, жұмысшылардың жататын базаларын салу, жарық тарту, техникаларды жеткізу сияқты дайындық жұмыстарын жүргізеді.

- Сол дайындық жұмыстары жүргізілгенге дейін республикалық бюджеттен қаржы бөлініп қояды. Сонымен қатар, көпір құрылысы аяқталғанша Құлынжон ауылынан көпірге апаратын 16 шақырымдық жол салынады, - дейді Нұржан Жұмаділов.

Айта кетейік, мердігер компанияны анықтау үшін байқау 15 ақпанда жарияланады. Осы күннен 70 күн аралықта мердігер компанияның есімі белгілі болады. Бұл шамамен сәуір-мамыр айы.