ШҚО-да Белоусов кен байыту фабрикасының (ББФ) жұмысы тоқтатылды
Бизнес-процестерді оңтайландыру, шығындарды азайту және ресурстарды үнемдеу мақсатында фабриканың жұмысын тоқтату және кәсіпорынды консервациялау туралы шешім қабылданды
Белоусов КБФ-да өңделген Ертіс шахтасының кені Николаев КБФ-на жөнелтілетін болады. 2016 жылы Николаев фабрикасында ауқымды модернизация жүргізілді және кәсіпорынның қуаты қосымша шикізат көлемін өңдеуге мүмкіндік береді. ББФ-ның жабылуы "Шығыстүстімет" ЖШС-нің және жалпы Топтың өндірістік көрсеткіштеріне әсер етпейді.
ББФ-ның қызметкерлер саны - 246 адам. Консервациялау жұмыстары кезеңінде кәсіпорында 26 адам жұмыс істейтін болады. Еңбек шарттарын бұзу кезінде еңбек заңнамасының барлық нормалары сақталып, ұжымның мүдделері барынша ескерілетін болады. Компанияның басқа кәсіпорындарында бос орындар болған жағдайда жұмыстан босатылатын қызметкерлерге олардың біліктілік деңгейі мен жұмыс тәжірибесіне сәйкес келетін жұмыс орындары ұсынылады.
ББФ "Шығыстүстімет" ЖШС Ертіс өндірістік кешенінің құрамына кіреді. Ол ШҚО Глубокое ауданы Белоусовка кентінде орналасқан. 1945 жылы іске қосылды. Компанияның құрамына 1999 жылы кірді. Ертіс шахтасының кенін өңдейді.- Белоусов кен байыту фабрикасы біздің байырғы кәсіпорындарымыздың бірі. Ол өткен ғасырдың 40-жылдарынан бастап жұмыс істеп келеді. Шикізат базасының біртіндеп азаюына және Шығыстүстіметтің байыту қуаттарын толық жүктеу қажеттілігіне байланысты біз Белоусов КБФ-ның жұмысын тоқтатуға және Ертіс шахтасының кенін Николаев КБФ жөнелтуге мәжбүрміз, - деп мәлімдеді "Шығыстүстімет" ЖШС-нің басқарма төрағасы Ильсур Даутов.
2019 жылдың бірінші жартыжылдығында ББФ-да 276 мың тонна кен өңделіп, 3,1 мың тонна концентраттағы мыс, 6 мың тонна коцентраттағы мырыш өндірілді.