Өскемен мен ШҚО Өскеменде лотерея түрінде казино бизнесін жүргізіп келген
Шұғыл алдын алу шаралары кезінде облыстық Экономикалық тергеу департаментінің қызметкерлері ірі ойын автоматтарын тәркіледі
Белгісіз азаматтар қаладағы ойын-сауық орталықтарының бірінен орын жалға алып, лотерея залы ретінде көрсетіп онлайн-казино ұйымдастырған.
Заңсыз ойын бизнесін ұйымдастырушылар мынадай жолмен жұмыс істеген: аллдымен ойыншылар кіру үшін 10 мың теңге төлейді, ал операторлар ол қаржыны карталарына аударып бергеннен кейін ойын автоматтары іске қосылған. Ал ойыншының ұтысы кассадан берілген.
- Зал ішін тексеру кезінде 1 млн теңгеден астам сома, 20 "BINGO 37"аппараттық-бағдарламалық кешен, плазмалық теледидар, моноблоктар, жүйелік блоктар, ойынхана қызметкерлерінің ұялы телефондары мен "MONTE CARLO BINGO 37" деген жазуы бар киімдері түгелдей тәркіленді, - деп мәлімдеді ШҚО Экономикалық тергеу департаментінің баспасөз қызметі.
Одан өзге, ойынханада лицензиясыз сатылып келген алкогольдік ішімдіктер тәркіленді.
- Қазір тәркіленген заттар талдамаға жіберілген, - дейді департаменттегілер. - Аталмыш факті Сотқа дейінгі тергеп-тексерудің бірыңғай тізілімінде ҚР ҚК 307-бабы 2-бөлігі "Заңсыз ойын бизнесін ұйымдастыру" бойынша тіркеліп, тергеу жүргізілуде.
Естеріңізге сала кетейік, Қазақстанда ойын бизнесін жүргізуге тек екі орында – Ақмола облысындағы Шучинск-Бурабай сауықтыру аймағында және Қапшағай су қоймасының оң жағалауында рұұқсат етілген. Ал электронды казино және интернет-казиноға Қазақстан Республикасында тыйым салынған.