Өскемен мен ШҚО Өскеменнің 20-шы және 21-ші шағын аудандарына жарық тартылды
Аудан тұрғындары облыс әкімі Даниал Ахметовті шақырып, алғыс білдірді
Бұл ауданда барлығы 630 жер учаскісі таратылған. Қазіргі уақытта тек 45 учаскісіне ғана үй салынған. Тұрғындардың қала билігінен жарық тартып беруді өтінгеніне үш жылдай уақыт болған. Көктем шыға бұл ауданға облыс әкімі Даниал Ахметов те ат басын тіреп, жарық тартып беремін деп уәде берген.
- Әкім уәдесінде тұрды. Сөз берген уақыттың ішінде жарық тартылып бітті. Енді жол салып берсе деген өтінішіміз бар, - деп алғысын білдірді Аслан Ахметов есімді қала тұрғыны.
Өскемен қаласы әкімінің орынбасары Тамара Рақымжанованың айтуынша, ауданға 57 жарық бағаны орналастырылған. Жарық желісінің ұзындығы төрт шақырымға жетеді. Жақын арада бұл жерге су мен жылу да тартылмақ. Әзірше, бір шақырымнан асатын жерге қиыршық тастар төгіліп, көлік жүруге аз да болса ыңғайлы жол төсеп қойған.
- Бұл шағын аудандарға инфрақұрылым тарту үшін бюджеттен 1 млрд теңге бөлінбек, - дейді Даниал Ахметов.