Өскемен мен ШҚО Нұрлан Ермекбаев ШҚО әскери бөлімдерінің жауынгерлік әзірлігін тексерді
Қорғаныс ведомствосының басшысы генерал-майор Н. Ермекбаев Аягөз және Өскемен гарнизондарының құрамалары мен әскери бөлімдерін тексерді
Қазақстан Республикасының Қорғаныс министрлігінің ресми сайтында хабарланғандай, "Шығыс" өңірлік қолбасшылығына жұмыс сапары барысында Қорғаныс министрі қару-жарақ пен әскери техниканың сақталу тәртібі және шарттарымен, оқу-материалдық базаның жай-күйімен және әскери қызметшілердің әлеуметтік қамтамасыз етілу мәселелерінің іске асырылуымен танысты, сондай-ақ инфрақұрылым мен техникалық аймақ нысандарын аралап шықты. «Майлин» оқу-жаттығу полигонында қорғаныс ведомствосының басшысына "АрХО-2019" аясында "Танк биатлоны" халықаралық байқауына дайындықтан өтіп жатқан танк экипаждарының жаттығуы көрсетілді. Қоймаларда атыс қару-жарағының, киім-кешектің, азық-түлік пен әскери-техникалық мүліктің сақталуы тәртібі туралы қолбасшылық басшыларының баяндамаларын тыңдады.
Сапар барысында әскери ведомство басшысы инженерлік техниканың дайындығына ерекше назар аударды. Оның қабілеттілігі жол салуға инженерлік нормативтің практикалық іс-қимылдарын орындау барысында паш етілді. Одан басқа, оқ-дәрілерді түпкілікті жарақталған қалыпқа келтіру бойынша зертханалық пунктінің жұмысымен танысты. Шығыс өңірінде болған кезде генерал-майор Н. Ермекбаев жауынгерлік әзірлікті, қару-жарақ пен әскери техниканы, сондай-ақ Әуе қорғанысы күштерінің әуе шабуылына қарсы қорғаныс бөлімшелерінде жауынгерлік кезекшіліктің ұйымдастырылу мәселелерін тексерді.
"Шығыс" өңірлік қолбасшылығындағы жұмысының қорытындысы бойынша Қорғаныс министрі қазіргі заманғы қарулы қақтығыстарда жауынгерлік іс-қимылдардың сипаты мен жүргізілу әдістерінің өзгеруін ескере отырып, жауынгерлік даярлықты жетілдіру, сондай-ақ алдағы оқу кезеңіне қару-жарақ пен әскери техниканың сақталуын қамтамасыз ету мәселелері бойынша әскери бөлімдердің қолбасшылығына нақты тапсырмалар берді.
