Өскемен мен ШҚО 
ҰОС ардагерлері бір ай бойы ауруханаға тегін тексеріледі
Ұлы Отан соғысының 74 жылдық мерекесіне орай, 25 сәуір мен 25 мамыр аралығында "Қамқорлық-Забота" атты акция өтеді
Акция аясында облыс ауруханалары мен емханаларында "Ашық есік күні" ұйымдастырылады. Яғни, Ұлы Отан соғысы ардагерлері мен тыл ардагерлері ауруханаға тегін келіп қаралып, емделе алады.
- Ардагерлердің денсаулығын бақылау аймақ денсаулық сақтау саласының басты бағыттарының бірі. Қатары күн санап азайып бара жатқан қаһармандарымыздың денсаулығын үнемі бақылауда ұстап отыру қажет, - дейді ШҚО Денсаулық сақтау басқарма басшысының м.а. Ілияс Мұхамеджан.
Дәрігерлер ардагерлердің үйіне келіп те, медициналық тексеріс жасай алады.
- Өзі тұрып келе алмайтын ардагерлердің үйіне дәрігерлер келіп ем жүргізеді. Невролог, терапевт, хирург, көз дәрігері, отоларинголог сынды біліктілігі жоғары мамандар барады, - дейді бас дәрігер.
Қазіргі уақытта Шығыс Қазақстан облысында 187 ардагер мен Ұлы Отан соғысының мүгедектері тұрады. Одан бөлек, 14 мыңдай еңбек ардагерлері бар.
