Өскеменнің полициясы ереже бұзғандарға планшеттің көмегімен айып салуда

Қазірдің өзінде Өскемен қаласындағы жол-патрульдік полиция қызметкерлерінің қолында 100 планшет бар.

Тәжірибе көрсеткендей, әкімшілік заң бұзушылықтарға қатысты хаттамаларды электронды түрде рәсімдеу арқылы уақыт үнемдеуге болады. Бұрын бұл үрдіс 15-20 минут уақытта алатын. Енді полиция қызметкерлері планшеттің көмегімен шаруаны 3-5 минутта аяқтайды.

- Бұрын қызметкерлер қажетті ақпаратты кезекші бөлім арқылы алып отырса, енді мәліметтердің барлығы бір планшетке жүктелген, - дейді Өскемен қалалық Полиция басқармасының басшысы Дәуір Ибраев. - Бұрын қызметкер кезекшілікті өткізу кезінде қағаз хаттамалардағы мәліметтерді базаға енгізу үшін техниктерге беруі керек болатын. Ал қазір әкімшілік заңбұзушылықтар бойынша ақпараттар бірден базаға түседі де, осылайша пара беру жағдайларының да алдын алуға болады.

ШҚО ПД баспасөз қызметі хабарлағандай, жыл басынан бері облыстың тәртіп сақшылары электронды түрде 23 мың хаттама толтырған.