Жолдардың сапасын тексермек

Жолдың техникалық талаптары тексерілгенімен, оны тексерген комиссияға жауапкершілік арта алмайсың.

Аймақта салынып жатқан жолдарға көңілі толмаған қоғам белсенділері осындай мәлімдеме жасап отыр. Айтуларынша, салынып біткен жолдардың сапасын тексеру шаралары тым көмескі, көлеңкелі әрі жауапты тұлғаны жазаға тарту мен міндет жүктеу жағы да осал. Сондықтан да қазір салынып жатқан жолдардың сапасы нашар.

- Шығыс Қазақстанның жол жөндеу жұмыстарына былтырдан бері өте көп қаржы бөлінді. Бұрын-соңды республикалық бюджеттен мұндай қаржы бөлініп көрмеген. Алайда салынған, жөнделген жолдың сапасына көңіл толмайды. Қазір, міне, қар еріп, жер жібіп жатыр. Қармен бірге асфальт та тесік-шұрық болып тұрғындарды әбден мезі қылды. Өзімізді-өзіміз алдап әбден шаршадық. Тексерістің де, техникалық талаптардың да барын біліп отырмыз. Бірақ сол тексеріс дұрыс орындалмайды. Техникалық бақылау жағынан да, мердігер мен тапсырыс беруші жағынан да сыбайлас жемқорлық бар сынды көрінеді, - дейді ШҚО Қоғамдық кеңес мүшесі Олег Чернышев.

Былтыр басы да, арты да дауға қалған Семей-Қарауыл тас жолының жартысы жөнделіп біткен болатын. Қалғаны биыл жөнделеді. Енді ШҚО Мемлекеттік қызмет істері агенттігінің қызметкерлері мен қоғамдық кеңес мүшелері бірігіп, қар еріп біткен соң, Семей-Қарауыл тас жолын тексеріп қайтпақ. Одан әрі жолдың техникалық талаптарын тексеретін әрі қабылдап алатын тұлғаларды жауапқа тартудың жолдарын реттеп, заңға өзгерістер енгізу жағы да қарастырылмақ.

- Олай болмаса, бұл былық әлі де жалғаса береді. Ал бюджеттің қаржы құр далаға кетпек, - дейді ШҚО мәслихатының хатшысы Владимир Головтюк.