Өскемен мен ШҚО Өскемен полицейлері бейітті тонап жүрген қарақшылар тобын ұстады
Бейіт сыртындағы темір қоршауларды ұрлаумен айналысқан қарақшылар 100 мың теңгенің затын қолды қылған
Өскемен қаласының №2 сотының берген мәліметтеріне қарағанда, 41 жастағы ер адам бейіттерді былтырдан бастап тонай бастаған. Кейін оның "бизнес-жобасын" сүйіктісі де қолдап, енді бейіттерді екеуі бірігіп тонаған. Бейіт басындағы қоршауларды бұзып жинап болған соң, "Газель" көлігін жалдап, темір өткізу пунктеріне барып, өткізіп жүрген.
Кейін бұл топқа бейіт тонап жүрген тағы бір ер адам қосылып, кәсіпті бірігіп жүргізген.
Бейітті кәнігі қылмыскерлердің тонап жүргенін полицейлер де сезген. Өйткені тұрғындардың өздері де шағымдана бастаған.
Қазір сот тек бандының екі мүшесіне ғана жаза тағайындады. Бейіт тонау туралы ой айтқан банды басшысына қатысты әлі үкім шыққан жоқ. Оның сүйіктісі бір жарым жыл бас бостандығын шектеу жазасына, ал үшінші мүшесі үш жыл бас бостандығын шектеу мен 200 сағат қоғамдық жұмыс жасау жазасына кесілді.