Өскемен мен ШҚО Риддер тұрғындары автобусты 40 минут күтуге мәжбүр
Күннің суығына шыдағанымен, қала тұрғындары қоғамдық көліктің кешігіп қатынауына шыдамақ емес
- Аялдамада автобусты жарты сағаттан астам уақыт бойы күтеміз. Мәселен, төртінші шағын ауданға қатынайтын №12 маршрутты 40 минут бойы күткен кезім болды. Жылы аялдама жоқ, қатты тоңып қалдым. Жан-жақтан жер үрлеп тұр. Үлкен кісілер әйтеуір, шыдаймыз ғой, ал балалардың жағдайы қалай болмақ? – дейді Татьяна Ивановна.
Ал Риддер қаласының ТҮКШ, жолаушылар көлігі және автомобиль жолдары бөлімінің хабарлауынша, автобустардың көбі қатынау аралығын, оның уақытын ұзартқан.
- "Лениногорское ПАТП" ЖШС-ның басшысы ауысуына байланысты маршрут графигі де өзгерді. Қазір автобустар 15-30 минут уақыт салып қатынауда, - дейді бөлім басшысы Қуат Мухаметчинов.
Бірақ автобустың жыры мұнымен аяқталған жоқ. Қала тұрғындары әлі күнге дейін қоғамдық көлікті бір сағат бойы күтуге мәжбүр.
- Кеше 12-ші маршрутты бір сағат бойы күттік қой деймін. Аяқ-қолымыз қатып қалды. Автобус келген кезде барлығы ішке қарай лап қойды. Бір-бірін таптап кетердей болды. Қаланың қоғамдық көлігіне не болды, білмейміз, - дейді Наталья есімді қала тұрғыны.
Қазір қалада 18 маршрут бар, оның 16-сы "Лениногорские ПАТП" ЖШС-на тиесілі. Бұл маршруттар бойынша 34 автобус қатынайды.
- Автобустар жеткілікті. Мәселен, 12-ші маршрут бойынша бес автобус қатынайды. Қатынау инвервалы 20 минут. Егер бір автобус сынып қалды дегеннің өзінде оны ауыстыра алатын автобустар бар. Тұрғындардың неге шағымданып отырғанын біз де түсінбейміз, - дейді "Лениногорские ПАТП" ЖШС директоры.
Қала тұрғындары мен басшылықтың сөзі бір жерден шығып отырған жоқ көріп отырғанымыздай. Автобустардың қайда жоғалып кетіп жатқаны бір құдайға ғана аян.