Қазақстандықтар дәрілердің кері әсері жайлы шағым түсіре алады

Дәрілік заттарды сараптау ұлттық орталығының мәліметтеріне сүйенсек, биыл елімізде дәрілердің кері әсері жөнінде 2 мыңнан астам хабарлама келіп түскен.

Шағым өткен жылмен салыстырғанда көп. Негізінен антибиотиктерге қатысты – 78%. Одан кейін қан ұйытуға қарсы немесе керісінше әсер ететін дәрілер, ісікке қарсы – 5%. Тізімде сүйек-буын жүйесін емдеуге арналған дәрілер, респираторлы және басқа да ауруларға қарсы дәрі-дәрмектер аз.

- Елбасы өзінің жолдауында тауар мен азық-түліктің, оның ішінде дәрі-дәрмек пен медициналық қызметтің де сапасына бақылауды күшейту керектігін атап өтті, - дейді орталықтық бас директоры Айгүл Шоранова. - Бұл барлығына ортақ кешенді жұмыс: өндірушілер, дистрибьюторлер, реттеуші және сарапшы органдар, дәрігерлер мен пациенттердің.

Дәрілердің кері әсерін байқаған жағдайда дәрігерлер де Ұлттық сараптама орталығының сайтынан арнайы үлгідегі үндеуді толтыра алады.