ШҚО-да браконьер бұланды атып алған
Жабайы аңның қалдықтары Зырян ауданындағы Топкий қайнарлары шатқалынан "Браконьер" жедел алдын алу шаралары кезінде анықталды
Жергілікті тәртіп сақшылары табылған зат туралы ауданның табиғатты қорғау полициясына хабарлаған. Олар дереу браконьерді іздеу жұмыстарын бастаған.
Браконьер бес күннен кейін табылды. Ол Жаңа Бұқтырма кентінің тұрғыны болып шыққан. Күдікті өзінің заңсыз әрекеттерін мойындаған. Тәркіленген бұланның еті сараптамаға жіберілді. 59 жастағы ер адамның айтуынша, ол аң аулаған қаруды өзенге лақтырып жіберген.
ШҚО ІІД баспасөз қызметі хабарлағандай, қазіргі таңда аңшылыққа қатысты ҚР ҚК "Заңсыз аңшылық" фактісі бойынша 337-баппен іс қозғалды.
"Браконьер" жедел алдын алу шараларының алғашқы кезеңінде тәртіп сақшылары 154 заңсыз әрекетті, аңшылық тәртібін бұзу бойынша 82 бұзушылық пен балықты заңсыз аулау бойынша 49 заңбұзушылықты анықтаған.