Өскемен мен ШҚО Алаяқ өз құрбандарының арқасында 8 млн теңгеге ие болған
Бейтаныс адамдарға сенім білдіру және қаржылық сауатсыздығының салдарынан азаматтар көбінесе алаяқтардың құрбанына айналып жатады
Жыл басынан бері облыста азаматтарды алдап несие алдыру бойынша 73 жағдай тіркелген. Көбінесе алаяқтар азаматтарға банктен несие рәсімдеуді ұсынады. Олар осылайша ол несиені өздері жауып отыратындықтарына, ал несие алып берген азаматтың несиелік тарихы реттелетіндігіне сендірген. Ал шын мәнінде ақшаны алған алаяқ сенгіш азаматты сан соқтырып, қарызға батырып, ізім-ғайып жоғалып кетіп отырады.
- Облыста 13 адам дәл осындай жағдайға тап болған. Олар 34 жастағы семейлік азаматшаның арбауына іліккен. Айлакер тұрғын азаматтардың сеніміне кіре отырып, оларға несие алғызып, жалпы сомасы 8 млн теңгені қалтасына басқан, - деп мәлімдейді ШҚО ІІД баспасөз қызметі.
Заманауи алаяқтар әбден жетілдірілген алдау-арбау тәсілдерін қолданады. Алайда азаматтар сауаттылық танытып, ешқандай желік сөзге ермесе, алаяқтықтың алдын алуға болады.