Жексенбі күні автобуспен қатынау қиындап кетті
Жексенбі күні ЖМК мен Сол жағалау аудандарының автобустары дұрыс жүрмей, тұрғындарға ыңғайсыздық тудырды
Тұрғындар демалыс күндері автобусты жарты сағаттап күтуге мәжбүр. Тіпті, кейбірі такси шақыруға мәжбүр болған. Бірақ қазір такси қызметі де ақсап тұр.
№ 24, 26, 46, 246, 230 бағыттағы автобустар сирек қатынаған көрінеді. Ал оған себеп – автобус жүргізушілерінің жетіспеушілігінде. Өскемен қалалық жолаушыларды тасымалдау орталығы басқармасы мәлімдегендей, қалада 40% ғана қоғамдық көлік жүргізушілері қалған.
- Автобустар бар болса да, жүргізушілер жоқ. Мәселен, "РОСТ" ЖШС-на соңғы үш жылда бірде-бір жаңа жүргізуші келмеген. Алайда ондағы жүргізушілер зейнетке шығып, еңбек демалысын алып немесе тіптен жұмыстан шығып кетіп жатыр, - дейді басқарма директоры Ернар Мустафин.
Қазір тасымалдаушылар жазғы кесте бойынша жұмыс істеп жатыр. Жолаушылар санының азайғандығына байланысты бағытқа шығатын қоғамдық көліктер де аз. Бірақ қыркүйектен бастап жағдай оңалмақ.