Астана көшесі биыл жөнделіп бітеді

Облыстық Қоғамдық кеңес мүшелері Астана көшесінің жөнделуі жайлы отырыс өткізіп, кейбір мәселелерді талқылады.

Отырыс барысында тұрғындардың бітпей жатқан жөндеу жұмыстарынан шаршағаны, көшенің тас-талқан болып жатқаны айтылды.

- Тұрғындардың көбі аулаларына кіре алмай жүр. Өйткені аулаға кіретін жолдардың кейбірі жабық жатыр, - дейді жұмыс тобының басшысы Надежда Сафонова.

Жөнделіп жатқан көшелердің кемшіліктерін анықтау үшін жұмыс тобы құрылып, рейд өткізілген болатын.

- Мәселен, Карбышев көшесі әлі жөнделіп бітпесе де, көліктер жүріп жатыр. Жаңа ғана салынған асфальт майысуға шақ қалған. Жиектастар мен тротуарлар да салынбаған, - дейді Надежда Сафонова.

Ал Сәтпаев даңғылының да астаң-кестеңі шығып жатыр. Тұрғындар да уақытша жол салмаудың кесірінен топарағы мен шаңы шығып жатқан жерлермен жүруге мәжбүр.

- Астана көшесінің бойына оның жөнделу, аяқталу мерзімі жазылған тақтайша қойылған болатын. Қазір ол жоқ. Бұған дейін көше шілде айының соңында жөнделіп бітеді делінгенімен, ол желтоқсан айына дейін созылатын болды, - дейді Надежда Сафонова.