ШҚО оқушылары ҰБТ тапсырды
Облыстық білім басқармасының ұсынған мәліметтеріне сүйенсек, биыл өңірде 9740 оқушы мектеп бітіріп, оның 7000-ға жуығы ҰБТ тапсырған
Биыл облысымыздан Ұлттық бірыңғай тестілеуге оқушылардың бар болғаны 70,5%-ы ғана қатысты. Ең жоғары 137 балды 4 түлек жинады.
- 2018 жылы 9740 түлектің 6864-і ҰБТ тапсырды. Оның 1168-і Өскемен қаласының түлектері. ҰБТ қорытындысы бойынша 6167 түлек шекті деңгейдегі балды жинаса, 769 түлек шекті деңгейден аса алмаған, - дейді ШҚО Білім басқармасы басшысының орынбасары Айгүл Байжанова.
Облыс бойынша ең төменгі балл - 16 баллды құрайды. Ал республика бойынша ең жоғары 140 балды жинаған Алматы қаласындағы №123 мектеп-гимназиясының бітірушісі Шиара Құдайбергенова екені белгілі болды. Ал облыстық басқарма ҰБТ-ның жалпы қорытындысын әлі шығармаған. Тіпті, республикалық қорытынды да нақты емес көрінеді.
- Жалпы республика көлемінде бес пәннен ҰБТ қорытындысы бойынша орташа балл - 83,1 (мүмкін болған 140 баллдан). Былтырғы жылғы көрсеткіш (мүмкін болған 140 баллдан) 80,5 балл болған, - деп мәлімдеді ҰБТ орталығының баспасөз қызметі.