Өскемен мен ШҚО Өскеменнің 23-ші шағын ауданында қоқыс үйіліп қалған
Тәкежанов көшесінде тұратын тұрғындардың бірі үш адамның ғана қоқыс тасу қызметіне ақы төлеп жүргенін айтады
Газет редакциясына 23-ші шағын ауданда тұратын тұрғындардың бірі хабарласып, ауданда тұратын адамдардың көбі қоқыс тасу қызметіне ақы төлемейтінін айтып шағымданды.
Келіншектің өзі "Өскемен-Тазалық" ЖШС-не төлемақы төлейді. Оның айтуынша, қоқыс көлігі коммуналды қызмет компаниясымен шарт жасасып, төлемақы төлеп отырған үйлерге ғана келіп, солардың қоқыстарын ғана тиеп әкетеді.
- Ал қалған қоқыстарды қайда апару керек, түсініксіз. Менің бір көршім аулада тұрған бактарға қоқыстарын толтырып салып жүр. Алайда бакты тазлап босатып кеткен жанды көрмедім, - дейді тұрғын.
Тұрғынның айтуынша, үйіне жөндеу жасайтын адамдар көп, алайда олар да қоқыстарын жинамай кетеді.
- Тұрғындарды біз міндеттей алмаймыз. Олар өздері жиналып, бір ауыздан келісіп, біздің компанияның қызметіне жүгінуі тиіс. Халық бастамашы болуы керек, - дейді "Өскемен-Тазалық" ЖШС басшысының орынбасары Ақыл Биқадамов.
Компания өкілі жақын арада 23-ші шағын аудан маңында рейд жүргізіліп, тұрғындарға түсіндіру жұмыстары жасалатындығын да айтып өтті.
