Өскемен мен ШҚО Өскемен аялдамасында мүгедек жан қайтыс болды
Абай даңғылындағы аялдамалардың бірінде 28 мамыр күні мүмкіндігі шектеулі жан көз жұмды
Сағат 22.00-де полицияға хабарласқан куәгерлер "Темірлан" сауда үйі маңында ер адамның жерде ес-түссіз жатқанын жеткізген. Қала тұрғыны мүгедектер арбасынан құлап қалған екен.
Ал куәгерлер арбасынан құлап қалған мүгедек жанға тұрғындардың бірден көмекке ұмтылмағанын айтады.
- Бұл маңда тіршілік қызу, қозғалыс көп. Трамвай мен автобус, таксистер жүреді, аялдама мен автобекет орналасқан. Адамдардың селқостығы мен мейрімсіздігі таңқалдырады. Ес-түссіз жатқан жанға көмек көрсетуге болар еді ғой, - дейді әлеуметтік желіде пікір қалдырғандардың бірі.
Хабарлама түскен соң, полиция қызметкерлері оқиға орнына келіп, ер адамның көз жұмғанын анықтаған. Денесінде жарақат не сызат жоқ.
- Көз жұмған азаматтың кім екені әлі белгісіз, - дейді Өскемен ІІБ баспасөз қызметі.