Бүлдіршінді өрттен құтқарған азамат табылды

Ол - "Казцинк" ЖШС кран машинисті Александр Попов. Ер азамат сол күні поштаға бара жатқанда пәтер балконында көмекке шақырып тұрған баланы көрген.

Александр Попов абыржымай бірден балкон арқылы өртеніп жатқан үйге кірген. Ол жерден баланы аман-есен алып шығып, өртті өз күшімен сөндірген.

Өскемен қалалық ТЖБ баспасөз қызметі хабарлағандай, Александр Попов 35 жаста және бүгінгі күні қыз бала тәрбиелеп отыр.

Естеріңізге сала кетсек, оқыс оқиға 16 мамыр күні сағат 9.00 шамасында Бажов көшесі бойында орналасқан пәтерлердің бірінде орын алған. Бірінші қабаттағы үйдің ас бөлмесінде қоқыс жәшігі өртенген. Құтқарушылардың пайымдауынша, үйден сіріңке тауып алған бала өрттің шығуына себепкер болуы мүмкін.