Глубокое кентінде үй салынады

Аудан әкімінің ойынша, баспаналы болуға кезекте тұрғандардың саны жыл сайын көбейіп келеді. Егер осыдан екі жыл бұрын ауданда 510-нан аса адам кезекте тұрған болса, қазір ол 670 адамға дейін жеткен. Сондықтан аудан халқының тұрғын үйге деген қажеттілігін қанағаттандыру үшін әкімдік алдағы уақытта екі көпқабатты үйді салуды көздеп отыр. 

- Алпыс пәтерлі бесқабатты үй Глубокое ауылында салынады. Былтыр бұл жерге су мен жарық тартылған. 2018 жылы Глубокое ауданында жүз пәтерлі және алпыс пәтерлі екі үйді салуға қаржы бөлінбек. Егер байқау жұмыстары сәтті өтетін болса, онда бұл үйлерді биыл салып бітуіміз керек. Биыл болмаса, онда келесі жылы нақты бітіретін боламыз, - дейді аудан әкімі Қалихан Байғонысов.

Сонымен қатар, былтыр күзде облыстық қазынадан 91 млн теңге қаржы бөлініп, Белоусовка ауданында 17 отбасына үй берілген. Тағы бір кәсіпкер екі тыл ардагеріне баспана сыйлаған. Қазір Глубокое ауданындағы үйлердің бір шаршы метрі 46 мың теңге тұрады.