Облыстың төрт ауданы мен Семей қаласында әлі де төтенше жағдай сейіле қойған жоқ

Аудандағы үлкенді-кішілі өзендердің барлығы арнасынан асып, тасып жатыр. Қазіргі уақытта ауданда 300 үй су астында жатыр.

Ал Бұқтырма өзені қатып жатқандықтан, таудан тасқын болып аққан су өзенге қосылмай, қоршалған бөгеттердің асып төгіліп, Малеевск ауылына жайылған. Ауылдың қариялары мұндай алапат тасқынның бұдан алпыс жыл бұрын ғана болғанын айтады. Мұнда 100 шақты үйді су басып жатыр.

Зубовск кентіндегі жағдай тұрақталғанымен, Зырян қаласының оңтүстік жағы қиын жағдайда тұр. Су әлі қайтпады. Алматы облысы мен оңтүстіктен келген құтқарушылар осы ауданда жұмыс жасап жатыр.

Ал судан зардап шеккен 130 адамға медициналық, психологиялық көмек көрсетілген.

- Тұрғындардың көңілін көтеруге тырысамыз, қиын мәселені саналы ақылмен шешіп, салқынқанды болуға үйретеміз, - дейді ШӨАЖҚЖ құтқарушы-психологы Оксана Петрова.

Облыс әкімі Даниал Ахметов судан зардап шеккендердің ешқайсысы назардан тыс қалмайтындығын, көмек көрсетілетіндігін айтады.