Иесіз қалған және заңсыз иемделген үйлер анықталады

Мемлекеттік тұрғын үй қорынан үй бөлі және тіркеу, азаматтардың жекелеген топтарын баспанамен қамту қызметтері бұрынғы тұрғын үй инспекциясына берілді. Мекеме жаңа қызметпен бірге жаңа атауға да ие болды – Өскемен қаласының тұрғын үй бөлімі.

Жаңарған мекеменің бір айлық жұмысында мемлекеттік қордан баспана алуға кезекте тұрған 500 адам жүгінген. Негізі кезекте тұрғандардың саны 11570 адамды құрайды. Бірнеше азаматтың баспана бабы жақын уақытта шешімін таппақ. Өскемен қаласының әкімі Қуат Тұмабаевтың тапсырмасымен қазір иесіз қалған, біреулер өз еркімен иемденіп алған тұрғын үйлерді анықтаумен айналысатын комиссия құрылуда.

Комиссия құрамына иесіз үйлер туралы ақпарат беретін жергілікті полицияның учаскелік қызметкерлері, азаматтардың өлімі туралы ақпараттарды беретін АХАТ қызметкерлері, жергілікті өзін-өзі басқару комитеттерінің мүшелері мен Өскемен қалалық тұрғын үй қатынастары бөлімінің мамандары кіреді.