Өскемен мен ШҚО 
ШҚО-да тегін дәрілер жетіспей жатыр
Облыстық денсаулық сақтау басқармасы неліктен тегін дәрілердің жетпей жатқандығын түсіндірді
Дәрілерді тасымалдаумен айналысатын "СК-Фармация" бірыңғай дистрибьютор компаниясы облыстың бірнеше ауруханасына тегін дәрілерді жеткізген. Алайда олар әлі жетпей жатыр.
- Басқарма дайындап берген тізім бойынша дәрі-дәрмектердің барлығы жеткізілді. Аурухана мен дәріханаларға да апарып, мұны дәлелдейтін құжаттарды дайындадық. Дәрінің жетіспеуіне, бәлкім, денсаулық сақтау басқармасының қажетті дәрілердің тізімін толық жасамауы себеп болуы мүмкін, - дейді мекеменің баспасөз хатшысы Інкәр Иманқұлова.
Ал бұл жағдайды ШҚО денсаулық сақтау басқармасы былайша түсіндірді.
- Дәрі-дәрмек тізімін жасау кезінде кейбір поликлиникалар мен ауруханалар өзіне қажетті дәрілердің тізімін толық жасамауы не мөлшерін дұрыс көрсетпеуі мүмкін. Сондықтан науқастың өміріне ең қажетті дәрі-дәрмектердің тізімі бірінші болып жасалады. Ал қазір бір тексеріс жұмыстарын бастадық. Жағдайды нақтылап, қажетті дәрілердің тізімін тағы жасаймыз, - дейді ШҚО денсаулық сақтау басқармасы басшысының орынбасары Ільяс Мұхамеджан.
