Өскемен мен ШҚО Облыс әкімі "Цифрлы Шығыс" жобасын орындай алмаған шенеуніктерді сынады
Аймақ басшысының ойынша, елді мекендерді ғаламтормен қамтымасақ, "Ақылды қала" идеясының күл-талқаны шықпақ
ШҚО-да былтырдан бастап "Ақылды қала" жобасы талқыланып келеді. Бұл жоба білім беру, денсаулық сақтау, көлік сынды қоғамға қажетті салалардың барлығын қамтымақ.
Бұл бағдарламаның аясында көшелерге бейнебақылау камералары орнатылып, бірыңғай төлем орталығы құрылып, автобустарда электронды билет беру аппараттары қойылуы тиіс еді. Ал ол үшін облыста жылдамдығы жоғары ғаламтор жүйесі қажет.
Алайда облыстың 341 елді мекенінде мүлдем ғаламтор жоқ. Мамандардың айтуынша, 140 ауыл жақында ғаламторға қосылуы ықтимал. Бұған 125 млн теңге.
- Мен былтыр жобаның тұжымдамасын тыңдаған едім, алайда ол жүзеге асырылмай жатыр. Ал ауруханаларды цифрландыру жүйесіне қосылуы өте баяу. Егер елді мекендерді ғаламтормен қамтымаса, ойлаған ойымыз мүлдем орындалмай қалуы мүмкін. Сондықтан бір айдың ішінде бұл мәселені шешетіндей бағдарлама әзірлеуіміз керек, - деп тапсырма берді облыс әкімі Даниал Ахметов басқармаларға.