Үлбі өзені ауылдықтардың үйіне жақын қалды

Ауылдың тұрғындарының айтуынша, Үлбінің суы жыл сайын бау-бақшаларына жайылып, қазір үйдің есік алдына дейін жақындап қалған. Тұрғындар әкімшілікке бірнеше мәрте жүгінгенімен, еш нәтижесіз. - Биыл су бақшаға кіріп, отырғызған егіннің жартысын құртты. Келесі жылы су, тіпті, үйіме кіре ме деп қорқамын, - дейді ауыл тұрғыны Светлана Шульмина. - Өзіміз жағалауды бекіте алмаймыз. Арнайы рұқсат керек. Ал оны алу оңай емес. Келер көктемде ауыл тұрғындарының үйін су баспасы үшін ауылдың жоғарғы жағына дамбы салып, Үлбінің ескі арнасын тазартып, тереңдету қажет. Алайда бұл жұмыстардың ешқайсысы да қолға алынбақ емес. - Биыл бұл жұмыстарға қаржы қарастырылмаған. Мүмкін республикалық бюджеттен бөлінетін шығар. Келесі жылы біз бұл сұрақты міндетті түрде шешетін боламыз, - деді Глубокое ауданы әкімінің орынбасары Сергей Кимасов.