Шығыс Қазақстанда туристік базалардың нақты саны белгісіз

Шығыс Қазақстанда халық көп баратын көлдер жағасындағы базалардың нақты саны белгісіз. Кәсіпкерлердің көбі өздерінің нысандарын мемлекеттік органдардан жасырып қалады. Сондықтан да облыстың туристік саласын бақылайтын және мемлекеттік кіріс органдары демалыс орындарының, үйлердің санынан шатасқан. Бұл жағдай ШҚО ішкі байланыстар және туризм басқармасының басшысы Жасұлан Сарсебаевты мазасын қашырған көрінеді. - Статистика департаментінің мәліметтеріне сүйенсек, Алакөл жағалауларында барлығы 130 база бар. Ал әкімдіктің берген мәліметтеріне сүйенсек, жұмыс істеп тұрған 147 база бар. Онда барлығы 5,5 мыңға жуық адам келеді. Соныдқтан да Алакөлдегі бір мерзімдегі ақша айналымы алты миллиард теңге айналасында болуы керек. Ал мемлекеттік кіріс органының мәліметінше, тек 72 миллион салық түскен, - деді Жасұлан Сәрсебаев. Бұқтырма су қоймасында да осындай жағдай қайталанып отыр. Сол себепті үкімет облыстағы барлық туристік нысандарды бір жүйеге енгізіп, электронды базаға тіркейді.